December 3, 2018

ನಂದಿ ಬೆಟ್ಟ ( Nandi Hills )

 ನನ್ನ ಜೀವನದಲ್ಲಿ ನಾನು ಅನೇಕಾನೇಕ ಪ್ರವಾಸಿ ಸ್ಥಳಗಳಿಗೆ ಭೇಟಿ ನೀಡಿದ್ದೇನೆ.
ಆದರೆ  ನಂದಿ ಬೆಟ್ಟದ ಬಗ್ಗೆ ಇರುವ ಕುತೂಹಲ ಅದರ ಬಗ್ಗೆ ಕೇಳಿರುವ ವರ್ಣನೆ ಈ ನನ್ನ ಪ್ರವಾಸವನ್ನು ಸಾರ್ಥಕ ಎನಿಸಿದೆ.

ನೀವು ಬೆಂಗಳೂರಿನವರಾದರೆ ಇದು ನಿಮಗೆ ಸರ್ವೇ ಸಾಮಾನ್ಯ ಪ್ರವಾಸಿ ತಾಣದಲ್ಲೊಂದು ಅನಿಸಬಹುದು .ಆದರೆ ನನ್ನಂತ ದೂರದ ಎಲ್ಲಿಂದ ಲೋ ಬಂದು ಬೆಂಗಳೂರಿನಲ್ಲಿ ನೆಲೆಸಿರುವ ಮತ್ತು ನಂದಿ ಬೆಟ್ಟದ ವರ್ಣನೆಯನ್ನು ಓದಿ ಬೆಳೆದಿರುವವರಿಗೆ ಭೇಟಿ ನೀಡಿದಾಗ ಮೈ ರೋಮಾಂಚನ ಆಗುವುದು ನಿಜವಾಗಿಯೂ ಹೌದು.

ಅದೊಂದು ದಿನ ಯಾಕೋ ಗೊತ್ತಿಲ್ಲ ನನ್ನೊಬ್ಬ ಗೆಳೆಯ ನಂದಿ ಬೆಟ್ಟದ ಪ್ರವಾಸದ ಬಗ್ಗೆ ನನ್ನ ಹತ್ತಿರ ಮಾತನಾಡುತ್ತಿದ್ದೆ. ನಿಜವಾಗಿಯೂ ಅವನ ಮನಸ್ಸಿನಲ್ಲಿ ನಂದಿ ಬೆಟ್ಟಕ್ಕೆ ಹೋಗಬೇಕೆನ್ನುವ ಕುತೂಹಲ ಇತ್ತು ಇಲ್ಲವೋ ಗೊತ್ತಿಲ್ಲ.ಆದರೆ ಅವನು ನನ್ನ ಹತ್ತಿರ ಚರ್ಚಿಸಿದ್ದ ರಿಂದ ಯೋಜನೆ ಸಿದ್ಧವಾಯಿತು .
ಹಾಗೆ ತಡಮಾಡದೆ ಕಾರ್ ಕೂಡ ಸಿದ್ಧವಾಯಿತು. ಬೆಳಿಗ್ಗೆ ಐದು ಗಂಟೆಯ ಜಾವ ನಮ್ಮ ಕಾರು ದೇವನಹಳ್ಳಿ ಸಮೀಪ ಇತ್ತು. ಇದೇ ದೇವನಹಳ್ಳಿಯಲ್ಲಿ ಇಂಟರ್ನ್ಯಾಷನಲ್ ಏರ್ಪೋರ್ಟ್ ಇರುವುದು.

ಆ ಕೊರೆಯುವ ಚಳಿಯಲ್ಲಿ ಸಹ ಹುಮ್ಮಸ್ಸು ನಮ್ಮಲ್ಲಿ .
ಬೆಟ್ಟದ ಬಗ್ಗೆ ವರ್ಣನೆಯನ್ನು ಮೊದಲೇ ಲೇಖನದಲ್ಲಿ ಓದಿದ್ದೆ. ಆದ್ದರಿಂದ ಯಾಕೋ ಮನಸ್ಸಿನಲ್ಲಿ ಇಲ್ಲಿಯ ಸ್ಥಳಗಳು ಅಲ್ಲಿಯ ಹಾವು ಹರಿದಂತೆ ಇರುವ ರೋಡ್ ಗಳು ಚಿರಪರಿಚಿತ ಅನಿಸುತ್ತಿದ್ದ ವು.

ಇಲ್ಲಿ ನಾನು ಏನು ಹೇಳ ಬಯಸುವುದೇನೆಂದರೆ ಇಂಥ ಪ್ರಕೃತಿಮಾತೆಯ ಸೌಂದರ್ಯವನ್ನು ನಮ್ಮ ಕಣ್ಮುಂದೆ ಬರುವಂತೆ ಮಾಡುವ ಲೇಖನ ಬರೆದವರು ನಿಜವಾಗಿಯೂ ಧನ್ಯರು. ಅದರಲ್ಲಿ ನನಗೆ ತುಂಬಾ ಇಷ್ಟವಾಗುವ ಲೇಖಕರೆಂದರೆ ಕೆ ಪಿ ಪೂರ್ಣಚಂದ್ರ ತೇಜಸ್ವಿ ಯವರು .ಇಂದಿನ ಆಧುನಿಕ ಜೀವನದಲ್ಲಿ ಓದುಗರ ಸಂಖ್ಯೆ ಕಡಿಮೆಯಾಗುತ್ತಿದೆ. ಆದರೆ ಕಥೆ ಕವಿತೆ ಲೇಖನ ರೂಪ ಇದೆಲ್ಲ ಒಂದು ಮಾಯ ಶಕ್ತಿ .ಇದಕ್ಕೆ ಸರಿ ಸಮಾನವಾದುದು ಯಾವುದು ಇಲ್ಲ .ಕಾಡಿನ ಕತೆಗಳು, ಅಡ್ವೆ೦ಚರ್, ಅಲೆಮಾರಿಯ ಅ೦ಡಮಾನ್ ಮತ್ತು ಮಹಾನದಿ ನೈಲ್ ಇವೆಲ್ಲಾ ನನಗೆ ಬಹಳ ಇಷ್ಟವಾದ ಪುಸ್ತಕ ಪುಸ್ತಕಗಳು.

ಕನ್ನಡದಲ್ಲಿ ಎಷ್ಟೋ ಮಹಾನ್ ಕವಿಗಳು ತಮ್ಮ ಬರಹದಿಂದ ಕನ್ನಡದ ಹಿರಿಮೆ ಗರಿಮೆಯನ್ನು ಹೆಚ್ಚಿಸಿದ್ದಾರೆ ಅಂತವರಿಗೆಲ್ಲ ನನ್ನ ಕೋಟಿ ಕೋಟಿ ನಮನ .

ನಂದಿ ಬೆಟ್ಟದ ಸೌಂದರ್ಯವನ್ನು ಇಲ್ಲಿನ ವಿಡಿಯೋದಲ್ಲಿ ನೀವೇ ನೋಡಬಹುದು. ಇಲ್ಲಿನ ಸಣ್ಣ ಸಣ್ಣ ಮಚಾನು ಗಳು, ಸುತ್ತಮುತ್ತಲ ಮರಗಿಡಗಳು ,ಟಿಪ್ಪು ಡ್ರಾಪ್ ಬೆಟ್ಟದ ಮೇಲಿರುವ ದೇವಸ್ಥಾನ ಇವೆಲ್ಲವೂ ಪ್ರವಾಸಿಗರ ಮನಸ್ಸಿಗೆ ಮನಸ್ಸಿಗೆ ಮುದ ನೀಡುವುದರಲ್ಲಿ ಸಂದೇಹವೇ ಇಲ್ಲ.

ನಿಮ್ಮ ಸಂಚಾರಿ ಮಿತ್ರ…

 

Click Here for more Pics : ನಂದಿ ಬೆಟ್ಟ ( Nandi Hills ) Photo Gallery.

October 27, 2018

ಕರಿಕಾನಮ್ಮ ಬೆಟ್ಟ (Karikanamma Hill ) – One of the highest peak in the Honnavar -Kumta Taluk

ಕರಿಕಾನಮ್ಮ ಬೆಟ್ಟ… ಈ ಪವಿತ್ರ ಸ್ಥಳ ಇರುವುದು ಈಗ ನಾನಿರುವ ಕುಮಟಾದಿಂದ ಕೇವಲ ಮೂವತ್ತು ಕಿಲೋಮೀಟರ್ ದೂರದಲ್ಲಿ. . ಆದರೆ ಹತ್ತಿರದಲ್ಲಿ ಹುಟ್ಟಿ ಬೆಳೆದಿರುವ ನನಗೆ ಈ ಸ್ಥಳದ ಮಹತ್ವ ತಿಳಿದದ್ದು ಅಲ್ಲಿ ಬೇಟಿ ನೀಡಿದಾಗ.
ಅದಕ್ಕೂ ಮೊದಲೇ ಸ್ಥಳದ ಮಹಿಮೆಯನ್ನು ಬೇರೆಯವರಿಂದ ಕೇಳಿ ತಿಳಿದಿದ್ದೆ ಅಷ್ಟೇ.

ಶನಿವಾರ ಬೆಳಿಗ್ಗೆ ಸ್ನೇಹಿತರ ಜೊತೆಗೂಡಿ ಪ್ರಯಾಣ ಆರಂಭಿಸಿದೆ ,ಆದರೆ ತುಂಬಾ ತಡವಾಗಿ .ನೀವೇನಾದರೂ ನಿಸರ್ಗ ಪ್ರಿಯರಾದರೆ ಪ್ರಕೃತಿ ಮಾತೆಯ ರಮಣೀಯ ಸೌಂದರ್ಯವನ್ನು ವೀಕ್ಷಿಸ ಬೇಕೆನ್ನುವ ಆಸೆ ನಿಮಗಿದ್ದರೆ ನಸುಕಿನ 6 ಗಂಟೆ ಸರಿಯಾದ ಸಮಯ . ಇಲ್ಲಿನ ಪ್ರಕೃತಿ ಸೌಂದರ್ಯದ ಬಗ್ಗೆ ನಂತರ ಹೇಳುತ್ತೇನೆ.

ಸರಿಸುಮಾರು9 ಗಂಟೆ ಹೊತ್ತಿಗೆ ನಮ್ಮ ಕಾರು ಬೆಟ್ಟದ ನ ಮೇಲೆ ಇತ್ತು. ಅಲ್ಲಿ ತಲುಪಿದ ನಾವು ಮೊದಲು ಭೇಟಿ ಕೊಟ್ಟಿದ್ದು ತಾಯಿ ಕರಿಕಾನ ಪರಮೇಶ್ವರಿ ದೇವಸ್ಥಾನಕ್ಕೆ .ಈ ದೇವಸ್ಥಾನ ಶ್ರೀಧರ ಸ್ವಾಮಿ ಅವರಿಂದ ಸ್ಥಾಪಿಸಲ್ಪಟ್ಟಿದೆ ಎಂದು ಕೇಳಿದ್ದೇನೆ. ಈ ದೇವಸ್ಥಾನದ ವಿಶೇಷತೆ ಏನೆಂದರೆ ದೇವಸ್ಥಾನದ ಗರ್ಭಗುಡಿಯು ಒಂದೇ ಶಿಲೆಯಿಂದ ಕೆತ್ತಲಾಗಿದೆ.
ದಿನನಿತ್ಯ ತಾಯಿಯ ದರ್ಶನಕ್ಕೆ ಅನೇಕಾನೇಕ ಭಕ್ತರು ಹತ್ತಿರದ ಊರುಗಳಿಂದಲ್ಲದೆ ದೂರದ ಬೆಂಗಳೂರಿನಂತಹ ಮಹಾನಗರ ಗಳಿಂದ ಬರುತ್ತಾರೆ. ದೇವಸ್ಥಾನದಲ್ಲಿ ನೀಡುವ ಅರಿಶಿನ ಪ್ರಸಾದ ಅನೇಕ ಚರ್ಮರೋಗಗಳನ್ನು ದೂರ ಮಾಡುವುದೆಂಬ ನಂಬಿಕೆ ಕೂಡ ಇದೆ .ತಾಯಿಯ ದರ್ಶನ ಪಡೆದ ನಮಗೆ ಮುಂದೆ ನೆನಪಿಗೆ ಬಂದಿದ್ದು ದೇವಸ್ಥಾನದ ಪ್ರದೇಶದಲ್ಲಿರುವ View point.

ಅಂತಹ ರಮಣೀಯವಾದ ಪ್ರಕೃತಿ ಸೌಂದರ್ಯವನ್ನು ಅಂದೇ ನಾನು ಕಂಡಿದ್ದು .

ದೂರದವರೆಗೆ ಕಣ್ಣಾಯಿಸಿದರೂ ಕಾಣುವ ಹಚ್ಚಹಸುರಿನ ಗಿರಿ ಕಾನನಗಳು, ಆ ಮಂಜು ಮುಸುಕಿದ ಪರ್ವತದ ತಪ್ಪಲಿನಲ್ಲಿ ನದಿ, ಇನ್ನೊಂದು ಕಡೆ ದೂರದಲ್ಲಿ ಕಣ್ಣು ಹಾಯಿಸಿದರೆ ಅರಬ್ಬಿ ಸಮುದ್ರ …..ಒಂದು ಕ್ಷಣ ಯಾರನ್ನಾದರೂ ಮೂಕವಿಸ್ಮಿತರನ್ನಾಗಿ ಮಾಡುತ್ತದೆ .

ಪ್ರಕೃತಿ ಸೌಂದರ್ಯದ ನಡುವೆ ನಮ್ಮನ್ನೇ ನಾವು ಮರೆತು ಮುಂದಿನ ಜನ್ಮವೊಂದಿದ್ದರೆ ಇಂತಹ ಮಲೆನಾಡಿನ ತಪ್ಪಲಿನಲ್ಲಿ ಹುಟ್ಟಬೇಕು ಎನ್ನುವ ಭಾವನೆ ಬರುವುದು ಸಹಜ ಬಿಡಿ.

ದೇವಸ್ಥಾನದ ಮೇಲ್ಗಡೆ ಬೆಟ್ಟದ ಒಳಗೆ ಸಣ್ಣ ಕಾಲ್ದಾರಿ ಇದೆ . ಟ್ರೆಕಿಂಗ್ ಪ್ರಿಯರಿಗೆ ಇದು ಹೇಳಿಮಾಡಿಸಿದಂತಿದೆ. ಸುಮಾರ್ ಒಂದು ಕಿಲೋಮೀಟರ್ ದೂರದಲ್ಲಿದೆ ಇನ್ನೊಂದು ದೇವಸ್ಥಾನವಿದೆ. ಇಲ್ಲಿ ಹೋಗಲು ಪ್ರಯತ್ನಿಸಿ ಮಳೆಯ ಕಾರಣದಿಂದ ಅರ್ಧದಲ್ಲಿ ಹಿಂದಿರುಗಬೇಕಾಯಿತು.

ಅಲ್ಲಿಗೆ ಅಂದಿನ ಸಂಚಾರ ಮುಗಿದು ಮನೆಯ ಕಡೆ ವಾಪಸ್ ಹೊರಟೆವು. ದಾರಿ ಮಧ್ಯೆ ದೇವಸ್ಥಾನಕ್ಕೆ ಬಂದ ಪ್ರಯಾಣಿಕರೊಬ್ಬರು ನಡೆದುಕೊಂಡು ಹೋಗುತ್ತಿರುವುದು ನಮ್ಮ ಗಮನಕ್ಕೆ ಬಂತು .ಅಲ್ಲಿ ಸಂಚಾರದ ಸೌಲಭ್ಯ ಸ್ವಲ್ಪ ಕಡಿಮೆ ಇರುವುದರಿಂದ ಅವರನ್ನು ನಮ್ಮ ಕಾರ್ ನಲ್ಲಿ ಹತ್ತಿಸಿಕೊಂಡು ಮುಂದುವರಿದೆವು.

ಆ ವ್ಯಕ್ತಿ ದೇವಸ್ಥಾನಕ್ಕೆ ಮದುವೆಯ ಕರೆಯೋಲೆ ಇಟ್ಟು ದೇವರ ದರ್ಶನ ಪಡೆಯಲು ಬಂದವರು. ನಮಗೂ ಕೂಡ ಕರೆಯೋಲೆಯನ್ನು ಕೊಟ್ಟು ದಯವಿಟ್ಟು ಬನ್ನಿರೆಂದು ಕರೆದರು . ಅವರ ಒಳ್ಳೆ ಮನಸ್ಸು ಕಂಡು ತುಂಬಾ ಖುಷಿ ಅನ್ನಿಸಿತು .ಅಪರಿಚಿತರಿಗೆ ಈ ತರ ವಿನಮ್ರತೆಯಿಂದ ವಿಶಾಲ ಹೃದಯದಿಂದ ಗೌರವಿಸುವರೇ ನಿಜವಾದ ಸಂಚಾರಿ ಮಿತ್ರರು.

ನಿಮ್ಮ ಸಂಚಾರಿ ಮಿತ್ರ…

October 1, 2018

ಗೋಕರ್ಣ ( Gokarna ) – One of the best place to visit.

ಸೆಪ್ಟೆಂಬರ್ 15, 2018, ಆಗ ನಾನು ನನ್ನೂರಿನಲ್ಲಿ ಇದ್ದೆ. ನಾನು ಕೆಲಸ ಮಾಡುವುದು ಬೆಂಗಳೂರಿನಲ್ಲಿ. ಎರಡು ದಿನ ರಜೆ ಸಿಕ್ಕರೆ ಊರ್ ಕಡೆ ಹೋಗುವುದು ನನ್ನ ರೂಡಿ. ಈ ಸಲ ಗಣೇಶಚತುರ್ಥಿ ರಜೆ ಬೇರೆ. ನನ್ ತರಾನೇ ನನ್ ಫ್ರೆಂಡ್ಸ್ ಕೂಡ ಊರಲ್ಲಿ ಇದ್ದರು . ಈ ಆಧುನಿಕ ಜೀವನದಿಂದ ಬೇಸತ್ತಿರುವ ನಮಗೆ ಎಲ್ಲಾದರೂ ಹೋಗೋಣ ಎಂಬ ಯೋಚನೆ ಬಂತು.


ಗೋಕರ್ಣ… ನನ್ನೂರಿನಿಂದ 32.1 KM ದೂರ. ಬೆಳ್ಳಂಬೆಳಿಗ್ಗೆ ಬೈಕ್ ಹತ್ತಿ ಗೋಕರ್ಣದ ಕಡೆ ಹೊರಟೆವು. ದಾರಿ ಮಧ್ಯೆ ಸಾಣಿಕಟ್ಟೆ ಎನ್ನುವ ಊರು ಸಿಗುತ್ತದೆ. ಇಲ್ಲಿ ಬ್ರಿಟಿಷ್ ಕಾಲದಿಂದಲೂ ಉಪ್ಪು ತಯಾರಿಕೆ ಮಾಡುತ್ತಿದ್ದರೆಂದು ಕೇಳಿದ್ದೇನೆ. ಹಾಗೆ ಇಲ್ಲಿ ಹಳೆ ಕಾಲದ ಕಟ್ಟಡದ ನಿಶಾನೆ ಕಾಣಸಿಗುತ್ತದೆ. ಗೋಕರ್ಣ ತಲುಪಿ ಶ್ರೀ ಮಹಾಬಲೇಶ್ವರನ ದರ್ಶನ ಮಾಡಿದ ನಮಗೆ ಮುಂದೆ ನೆನಪಿಗೆ ಬಂದದ್ದು ಕುಡ್ಲೆ ಮತ್ತು ಓಂ ಬೀಚ್ ಗಳು.

ಕರ್ನಾಟಕದ ಈ ನೆಲ ಪುಣ್ಯ ಕ್ಷೇತ್ರವಲ್ಲದೆ ದೇಶ-ವಿದೇಶಗಳಲ್ಲಿ ಹೆಸರು ಪಡೆದ ಬೀಚ್ ಗಳನ್ನು ಇಲ್ಲಿ ಪ್ರಕೃತಿ ಮಾತೆ ಅಣಿಗೊಳಿಸಿದ್ದಾಳೆ. ಕಣ್ಣು ಹಾಯಿಸಿದುದ್ದಕ್ಕೂ ನೀರಿನ ರಾಶಿ . ಬಿಳಿಗೆರೆಯ ದಡದಲ್ಲಿ ಮೇಲೇರಿ ಕೆಳ ನುಸುಳಿ ನರ್ತಕಿಯರನ್ನು ನಾಚಿಸಿ ನಲಿವ ಮೋಹಕ ತೆರೆಗಳು, ಸಾಗರದ ಮೇಲಿಂದ ಬೀಸಿ ಬರುವ ತಂಗಾಳಿ ಮೈ ಸೋಕಿದಾಗ ಇಲ್ಲಿಗೆ ಬಂದ ಪ್ರಯಾಣಿಗ ತನ್ನನ್ನು ತಾನೇ ಮೈಮರೆಯುವುದು ಸಹಜ. ಇಂದಿನ ಯಾಂತ್ರಿಕ ಯುಗದಲ್ಲಿ ಯಂತ್ರ ವಾಗುತ್ತಿರುವ ನಮಗೆ ಜೀವ ಜಗತ್ತಿನ ಪರಿಚಯ ಮಾಡಿಕೊಡುವುದು ಇಂಥ ಸ್ಥಳಗಳು.
ಬೆಂಗಳೂರಿನಿಂದ 484.6 KM ದೂರ ಇರುವ ಈ ಸ್ಥಳಕ್ಕೆ ವಾರದ ಎರಡು ದಿನದ ರಜೆಯಲ್ಲಿ ಕೂಡ ಭೇಟಿ ನೀಡಬಹುದಾದಂತಹ ಎಲ್ಲಾ ಸೌಲಭ್ಯವಿದೆ. ಬೆಂಗಳೂರ್ ಅಲ್ಲದೆ ಬೇರೆ ಕಡೆಯಿಂದ ಬರುವವರಿಗೂ ವಾಹನದ ಸೌಲಭ್ಯ ತುಂಬಾನೇ ಇದೆ..
ಅಂದಿನ ಅನುಭವ ಇಂದಿಗೂ ಮರೆಯಲಾಗದಂತದ್ದು. ಮನಸ್ಸಿನ ಅನೇಕ ಗೊಂದಲಗಳಿಂದ ದೂರವಾಗಿ ಧನ್ಯತಾ ಭಾವನೆ ಮನದಲ್ಲಿ ನೆಲೆಸಿದ ಗಳಿಗೆ ಅದು. ತಿಂಗಳಿಗೆ ಒಮ್ಮೆಯಾದರೂ ಇಂತಹ ಪ್ರವಾಸಿ ಕ್ಷೇತ್ರಗಳಿಗೆ ಭೇಟಿ ನೀಡಬೇಕು ಎನ್ನುವುದು ನನ್ನ ಅನಿಸಿಕೆ.

ನಿಮ್ಮ ಸಂಚಾರಿ ಮಿತ್ರ…

Click Here for more Pics : ಗೋಕರ್ಣ ( Gokarna ) Photo Gallery.